الثلاثاء، 28 أبريل 2015

آه يادنيا عيال عم ولا يتعارفون - الجزء الثاني

حمد:خلاص عنبوه كلتونى..ياله إنسير ..
محمد:دواك عيل شو ميلسنك في البيت..
في العين مول
يلسو في الكوفي وطلبو كبتشينو..وكيك..وقهوة..
حمدان:شباب بترخص بسير أشوف شو الفلم إلى بعرضونة اليوم وبييكم..
محمد: صدق والله أنا في خاطري أشوف فلم من زمان ما شفت فلم.
حمد: والله أنكم متفيجين ساحبينى من البيت عشان أشوف فلم بس مش منكم من إللى إيي وياكم؟؟؟
محمد: عنبوه حمد شو بلاك أنت اليوم ؟؟؟؟
وفي نفس الوقت سعيد:حمد عاد والله تراك مصختها..شو هذا؟؟؟؟!!
حمد: أنتو ما قلتولى أنكم بتشوفون فلم ...ولا والله ما شبرت..
سعيد: حمدان سير أنت ويا محمد وأنا بيلس وياه ما عليكم منة أنا بقنعة..
سار حمدان ومحمد ويلس سعيد ويا حمد...
سعيد:حمد شو بلاك اليوم؟؟؟؟؟؟؟؟شو فيك؟؟؟؟؟؟؟شو إلى مضايقنك؟؟؟
حمد: ما أدري بس أنا ما أحب هالمكان ...
سعيد: أوكية فالك طيب الحين منغيرة شىء في خاطرك بعد..
حمد: يا أخى أفهمنى أنا ما أحب المكان يعنى أريد أظهر من العين مول ممكن؟؟؟؟؟
سعيد: ليش خلنا شوية نيلس وبعدين منروح.. وبعدين حمد عيب عليك والله إضيج بالواحد شو بلاك حليلهم يبونك تسلى وأنت كل شىء ما تحبة.. بس عاد أصطلب ..
حمد: أوكية ..
سعيد: أقولك حمد قوم وياى..
حمد: وين تبى تروح ؟؟؟؟؟؟؟
سعيد: تعال يالله براويك المكان ومنتمشى ..
حمد: لو الحين ما طعت بتاكلنى ........خلاص ياللة شىء بعد؟؟؟
سعيد: ههههههههههه والله أنك سالفة..خلاص عاد أضحك
حمد:هههههههه شىء بعد..
سعيد: بسم الله الرحمن منك..
حمد: ترانى والله ما بسير..
سعيد وهو يضرب ظهر حمد:يالله عاد إلى ناقص أحب ريولك.وسارو يتمشون في العين مول عشان حمد كان مضايج ..وفجأه!!
سعيد: حمد ........
حمد: خـــــــــــــــــــــــــــير؟؟؟؟؟؟
سعيد: أحس شىء يمسكنى من كندورتى من عند الركبة..
ولتفت حمد وسعيد ...و شافو......
يوم إلتفت حمد وسعيد لورى شافو بنت صغيرة تريد تمسك كندورة سعيد..
سعيد وحمد أنصدمو من وين هالبنت ؟؟؟؟؟؟؟منوين يت؟؟؟
وبعد شوي صاحت ويلس سعيد وحمد يطالعون عمارهم ليش صاحت؟؟
سعيد: حبيبي ليش تصيحين؟؟؟؟
البنت:.........
سعيد: وين ماماه؟؟؟؟
البنت:.........
سعيد: وين باباه؟؟؟؟؟
البنت:........باباتى ..ومسكتت يده..ويلست تصيح
سعيد: ألحق تتحرانى أبوها......
حمد وهو ناقع من الضحك:..........حليلها تتحراك أبوها ما كنت أعرف أن شكلك شكل واحد عندة عيال.. ويلس حمد يضحك على سعيد...
سعيد: والله أنك خايس عنبوه بدال ما يالس تسكتها يالس تضحك...
حمد: والله عاد ما عندي خبرة باليهال طول.
سعيد: عيل ظك عنى.. يالس يضحك والبنت تصيح..
حمد:ههههههه..شو تبى أسويلك شلها وخلنا نمشى في المول وأكيد أهلها بشوفونها وبيون وبشلونها..
سعيد: هزرك؟؟؟؟؟؟
حمد: عيل شو تبانا يالسين هنيه ونطالعها وهيه تصيح؟؟؟؟
سعيد: أوكية... وشل البنت على كتفة ..
من شل سعيد البنت على كتفة سكتتة البنت وبعد شوي يلست تضحك..
حمد: أقول سعيد عنبوه كيف أهلها يخلونها إسير بعيد عنهم ولا بعد ما يسألون عنها ولا يدورون عنها؟؟؟؟
سعيد: وأنت شدراك يمكن الحين أهلها مرتبشين يدورونها؟؟ وبعدين من شكلها ولبسها تنشاف من عائلة محترمة وغنية..
حمد: عنبوه وأنت شدراك بكل هذا؟؟؟
سعيد:شوف شكلها وايد حلوة وبعدين لبسها وايد أنيق وحلو وريحتها دهن عود..
حمد: لا يعنى الحين كل إلى شكلة حلو ولابس ملابس حلو وحاط دهن عود من عائلة غنية؟؟
سعيد: أشدراك أنت به لأمور .
حمد: خلاص محطي العلم والمعرفة لك ..أوكية يا شارلك هومز عيل دور أهلها..
سعيد: أقول أمسك شوية البنت أنا بسير أشترى ألعاب وكافى لها..
حمد: حو أنا شدرانى باليهال؟؟؟؟
سعيد: ما يباله علم بس شلها وكلمها وقولها الحين بتى ماماه وباباه وبتسكت..
حمد: هزرك..
سعيد: يالله عاد أمسكها ما ببطى..
حمد: الله يعينى منك ومن مشاكلك..
سعيد: يالله باي..
شل حمد البنت وسار وياها لين الكوفي ويلسها على الكرسي..يلست البنت تشوف حمد وهى ساكتة وبعد شوي صاحت ..
حمد: يا هالبلشة شو الله بلشنى فيها ..الله ينطب محمد هو إلى قالى حمد شورايك نروح رحلة إلا لازم يقول شو رايك أخليك بيبي ستر..الله ينطبة..والله خاطرى افرها من الدري صدعتنى من كثر ما تصيح حشة بالعة مكرفون.. شو أسوي الحين كل الناس تشوفنى ..
شل حمد البنت ويلس يحوطبها في المول وشاف محل أطفال (مذركير)دش حمد المحل ويلس يشوف الملابس وإلا وشوية سكتت البنت شافت لعبة ويلست طالعها ..سار حمد وشترا كل الألعاب الموجودة في الرف عشان تسكت..وخطف وشترالها بعد آيس كريم ..
حمد:الحمد لله إفتكيت من الصدعة ..حبيبتى وين تبين تسيرين ؟؟تبين أوديج عند الألعاب.
ولا وشوية يحس شى بارد على كتفة ..حثرها الحبيبة خيست كتفة من الآيس كريم..
حمد: هذا إلى نا قصنى الله ينطب سعيد..الحين وين أنا أروح عشان أغسل الكندورتى ..
حمد:ألو سعيد والله لو ما يت الحين والله لخليت البنت تنفد بنفاد إلى يشلها ..عنلاتك زاد والله ما تينى المشاكل إلا من تحت راسك.
سعيد: حشــــــــــــــه كلتنى ..هيه إلا دقيقة قتلك تمسك البنت لين ما أشتري..
حمد:هيه دقيقة لو تشوف شو سوتبي بهالدقيقة على قولتك..تعال يالله بروح أتغسل..
سعيد: حمد أنا الحين مخلص وبحاسب خمس دقايق وبكون عندك..
حمد:لا تتأخر ولا تراك بتشوفنى في مستشفى الميانين..
سعيد: حشة حليلها تراها عمرها يمكن بس ثلاث سنين .
حمد: يعلها سنة بسرعة خلصنى ..
سعيد:أوكية ..الحين ياي أهتم فيها .باي
حمد:لا توصي....باي
يلس حمد يطالع عدالة إلا وشوية ما لقا البنت..خيبة وين سارة ويلس يدور عليها وهو خايف لا إييها شىء ولا حد يشلها ويلس يدور عليها وهو مش في حالة ..خيبة شو بقول حق أهلها؟؟ شو بقول حق سعيد؟؟ حليلها هية ما تفهم أنا شو سويت أكيد زعلت وسارت عنى ..الله ينطب هالحالة ....ولا وشوي ويشوفها نازلة من دري المتحرك ..ويربع حمد يريد يمسكها ويوم مسكها يلست تضحك تتحرى حمد يلعب وياها ..و حمد حضنها وهو فرحان أنها ما ياها شىء ..وكان متندم على كل كلمة قالها لها وأنة كان يذمر منها.. بس حمد عمرة ما مسك ياهل وعمرة ما شل ياهل وعمرة ما يعرف كيف يتعامل مع اليهال.. بس الحمد الله على السلامة ..
شل حمد البنت وداها الكوفي ويلسها ويلس يلعب وياها مع الألعاب إلى إشترالها..
وشوية وإلا البنت تمط حمد من كندورتة وتودية عند الألعاب ويلس يلعب وياها وهو يضحك على حركاتها وشوية يت الساعة تسع ..يت البنت عند حمد ورقدة على كتفة.. شلها على إيدة ويلس يشوفها ..صدق هالبنت تقول مثل ملاك ..الله يخلى أهلها لها ..ويحظهم بها...وشوية دق تيلفون حمد
حمد:هلا..
سعيد: هاه بشر و الوضع وياك؟؟؟
حمد: لا الينية رقدت..
سعيد: ههههههه حليلها ...إلا أقولك الحين شو نسوي ؟؟؟
حمد: والله ما أعرف يعنى وين أهلها ؟؟؟؟؟معقول جيه هم ما يدورونها؟؟؟
سعيد:والله ما أعرف شو أقولك بس أنا الحين بروح عند شرطى الأمن وبقولة..
حمد: يعنى أنا بتم عندها لين ما أتى وتبلغ عنها؟؟؟؟؟؟؟
سعيد: أنت ما تقول أنها راقدة ؟؟؟كيف بتم شالنها ؟؟حليلها خلها راقدة وبعدين أنا بيي ويا الشرطى وبياخذها من عندك..
حمد: خلاص أنا بكون في الكوفي ...
سعيد: خلاص عيل..
حمد: أقولك...وين حمدان ومحمد؟؟؟؟؟؟؟؟
سعيد: يايهاه الحين هم في السينما..
حمد: شو؟ والله مش منهم من إلى إييبهم ليش سارو عنا؟؟؟
سعيد: تراك ما تبى تشوفه وبعدين أنا قتلهم عن سالفة البنت وقلت لهم أنهم يسيرون ويشوفونة .
حمد: إلا مخوة بوش أنتو....خلاص أنا عيل بترياك..مع السلامة
سعيد:مع السلامة..
وشل حمد البنت صوب الكوفي وإلا يشوف في الدرب وحدة ياية صوبة وياها بشكارة.. أستغرب هاي شو تبى؟؟؟
....:
أنت كيف تتجرأ وتشل البنت؟؟ وأنا من ساعة أدور عليها؟؟ خسفت المول أدور عليها.. وما خليت شرطى إلا وقلتلة مواصفاتها..وعثرها عندك؟؟؟منو تتحرى عمرك؟؟ شو تتحرا إلا تعال وشل ؟؟؟شو تتحرى مالها ولى؟؟صدق والله سخافة..هات البنت.. جودي شلى شمة ويالا نروح السيارة ...
حمد وهو متغيض:خيرا تفعل شرا تلقى.. هذا الكلام إلى قالها لها لا زاد ولا قل وسكت ما قالها كيف لقاها ولا فهمها باللى إستوى وأنها ظلمتة بكلامها.. وعطى البنت للبشكارة وكل إلى إشترا لها وسار صوب الكوفي وهو يحس بضيق في صدرة ..ما كان عارف ليش هو مضيق يمكن عشان الكلام إلى سمعة منها؟؟ولا يمكن عشان أنة خلاص ما بشوف البنت ؟؟ولا يمكن أنها ظلمته بكلامها..وشوية يه سعيد...
سعيد: ول الخيبة شو سويت بالبنت؟؟وين خليتها؟؟؟
حمد: بعد لو وحش ؟؟جيه شو تتحرانى ؟؟..
سعيد:لا صدق وين البنت؟؟؟؟؟؟؟
حمد: شلوها أهلها..
سعيد: والله ؟؟؟
حمد: والله..
سعيد:الحمد لله أخيرا إفتكينا من الأمانة..
حمد: بس لو تعرف شو إستوى ؟؟؟
سعيد: شو إستوى؟؟؟؟
وخبر حمد سعيد شو إستوى....ويلس سعيد ناقع من الضحك ما قدر يسكت..
حمد: والله مش منك من إلى يخبرك...
سعيد: في ذمتك قالتلك هالكلام؟؟؟؟
حمد: هيه شو تشوفنى أتمصخر؟؟؟
سعيد: وأنت ما قلتلها شىء؟؟؟
حمد: لا بوك ما قدرة أقولها شىء..إستحيت أقولها شى
سعيد: بس هيه عطتك من هالبارد والله لو كنت مكانك لهزبتها وقفتها عند حدها.. تخسى إلا هية منو تكون هيه عشان تقولى هالكلام؟؟؟..
حمد: عيب عليك شو بتحطى عقلك وعقل بنات ؟؟؟
سعيد: يوم البنات ما لهن مذهب شو إسوي؟؟ لازم تأدبهن وتعلمهن كيف يثمنن كلامهن.ويكلمن الرياييل.
حمد: إنزين لو كنت مكانها ما بتخاف على البنت وبسوي شراتها؟؟ حرام كل واحد وعندة ظروف صح ولا لا؟؟
ويقطع سعيد كلام حمد:بس عاد مش أنها جيه تتكلم وجنك خطفت البنت؟؟؟
حمد: خلاص عاد إنسى السالفة ...والكلام إلى إنقال حقى مش حقك؟؟
سعيد: حتى ولو ؟؟
وياه حمدان ومحمد عند سعيد وحمد..
حمدان :هاه شو رديتوها البنت؟؟؟
سعيد: هيه..
محمد: عيل خلاص يله نروح البيت..
سارو الشباب صوب البيت ورقدو عشان باجر وراهم رحلة قنص..بس واحد منهم ما ياه الرقاد..إللى وهو حمد شال في خاطرة على البنت إلى كلمتة بهاي اللهجة ومستغرب من إللى إستوى له اليوم ... ويلس يفكر لين ما ياه الرقاد ورقد..

ليست هناك تعليقات: